O curso académico 2007-08 do Sistema Universitario Galego inaugúrase oficialmente este venres na USC

O acto inaugural do curso académico 2007-08 do Sistema Universitario de Galicia terá lugar este venres, día 28, no Colexio de Fonseca da Universidade de Santiago baixo a presidencia do titular da Xunta de Galicia, Emilio Pérez Touriño. Na mesa presidencial estarán ademais os reitores das tres Universidades galegas, Senén Barro, José María Barja e Alberto Gago; a conselleira de Educación da Xunta de Galicia, Laura Sánchez Piñón; e os presidentes dos Consellos Sociais das Universidades de Santiago e Vigo, Manuel Puga e Emilio Atrio, respectivamente.
A cerimonia, que se desenvolverá ás 12:00 horas no Salón Nobre, comezará coa lectura da lección maxistral ‘Capacidade de interpretación e predición dos modelos físicos’ impartida polo profesor Vicente Pérez Villar, catedrático de Física da Materia Condensada da Facultade de Física. A continuación, o reitor da Universidade de Santiago, Senén Barro Ameneiro, pronunciará o seu discurso, que dará paso á intervención do presidente da Xunta inaugurando oficialmente o curso académico.
Representación institucionalAo acto asistirán ademais o vicepresidente da Xunta de Galicia, Anxo Quintana; a presidenta do Parlamento de Galicia, Dolores Villarino; a conselleira de Cultura, Ánxela Bugallo; o Valedor do Pobo, Benigno López; a tenente de alcalde de Santiago, Mar Martín; o alcalde de Lugo, José C. López Orozco; o presidente da deputación de Lugo, José Ramón Gómez Besteiro; o presidente do Tribunal Superior de Xustiza, Antonio González Nieto; o arcebispo de Santiago, Julián Barrio; así como numerosas personalidades do mundo académico, cultural e político.