O curso de formación de titores de alumnos de primeiro curso remata con resultados moi positivos

A vindeira semana rematará na USC o curso de formación de titores de alumnos dirixido a estudantes que superaron o primeiro curso completo e que o vindeiro ano acollerán aos que comezan estudos de grao na USC. A avaliación que sobre estes titores se está a facer nas facultades que neste momento teñen implantados os estudos de grao está sendo moi positiva.
O curso impartiuse durante dúas semanas con dúas modalidades, unha específica para cada centro e outra común na que se trataron cuestións como a problemática académica, a mobilidade estudantil, o desenvolvemento curricular, as actividades culturais e deportivas, participación social e integración universitaria, o programa de Bolonia, os aspectos psicolóxicos do alumno de primeiro curso e a calidade e desenvolvemento sostible na USC.
Desenvolvidos no marco do programa de Calidade da USC, os cursos contan coa colaboración do Programa ‘A Ponte entre o Ensino Medio e a USC’, encargado de dar acollida aos estudantes de primeiro curso de grao na USC.