Un curso de verán analizará en Sanxenxo o impacto do turismo na economía e na sociedade

A Universidade de Santiago celebrará do 13 ao 15 de xullo na Sede Náutica Caixa Galicia de Sanxenxo o curso ‘Avaliación do impacto socioeconómico do turismo do século XXI’, co fin de proporcionar aos asistentes os fundamentos analíticos e conceptuais necesarios para poder abordar a análise cuantitativa e cualitativa dos fenómenos turísticos e as súas implicacións socioeconómicas e medioambientais.
Ao longo deste seminario, de 20 horas lectivas que dirixe Melchor Fernández Fernández, introducirase en primeiro lugar aos estudantes na investigación das relacións entre economía, turismo e medio ambiente e na utilización de técnicas de análise económica aplicadas ao turismo.
Abordaranse tamén as consecuencias do crecemento da actividade turística e as técnicas e métodos de avaliación do seu impacto socioeconómico. Analizaranse ademais as diferentes manifestacións da reciprocidade que se producen entre turismo e medio ambiente, dedicando parte do tempo de traballo ao estudio e a discusión de casos, medidas e propostas para minimizar o impacto negativo da actividade turística sobre o entorno e para optimizar o potencial que o turismo pode ter como elemento de recuperación e conservación do patrimonio natural.
A taxa xeral de matrícula para este curso, que se desenvolverá ata o 15 de xullo, é de 70 euros. Existe un prezo reducido, de 40 euros, para estudantes universitarios, persoas desempregadas e PDI e PAS da USC. O prazo para a inscrición, tanto a través internet como por vía presencial (ata o 3 de xullo), xa está aberto.