Unha delegación de responsables das universidades moldavas visita as instalacións da USC no Campus de Lugo

Unha delegación composta por representantes das universidades moldavas visitou o Campus de Lugo no marco dun proxecto quen ten como obxectivo a modernización da ensinanza superior neste país do Leste europeo mediante a renovación dos métodos de aprendizaxe e a implementación de recursos experimentais de e-learning. Este encontro forma parte das actividades do proxecto europeo ‘Creación de Redes Universitarias Temáticas de Ciencias Aplicadas e Económicas en Moldavia’ (CRUNT), do que forman parte nove universidades moldavas, dous ministerios deste país e outras universidades de diferentes estados da UE, entre as que se encontra a USC. A visita incluíu a asistencia a unha serie de relatorios sobre novas tecnoloxías que se desenvolveron na Aula de Produtos Lácteos da USC (desde onde se está a coordinar a visita) e un percorrido polas dependencias do centro e outros edificios do Campus de Lugo, como a Biblioteca Intercentros, a Escola Politécnica Superior, o Hospital Veterinario Rof Codina ou o CACTUS. A comitiva está formada por once representantes das universidades moldavas participantes no proxecto, entre eles sete reitores. O programa da visita continúa o martes 27 en Santiago e inclúe unha recepción por parte do reitor, Juan Casares, ademais dun itinerario polas instalacións dos diferentes campus composteláns da USC.