Unha delegación universitaria de Pernambuco presenta en Lugo a súa oferta de posgrao e o programa de mobilidade Print/Capes

Os profesores da Universidade Federal Rural de Pernambuco (Brasil) Ênio Farias de França e Silva e Valdomiro Severino de Souza Junio visitarán este mércores 2 de outubro o campus de Lugo para facer unha presentación da súa oferta de posgrao, así como do programa de mobilidade Print/Capes.

A vicerreitora de Coordinación do campus de Lugo da USC, Montserrat Valcárcel, ofrecerá unha recepción institucional ás 10.30 horas á delegación universitaria chegada de Pernambuco. Logo de participar neste encontro, os dous profesores brasileiros acudirán ata a Escola Politécnica Superior de Enxeñaría da USC para facer unha presentación, a partir das 13.00 horas, na sala de xuntas do centro lugués, da súa oferta de programas de posgrado da Universidade Federal Rural de Pernambuco relacionados coas áreas de enxeñaría agrícola e do solo.

A sesión servirá tamén de marco de presentación do programa de mobilidade interuniversitaria Print/Capes, unha iniciativa que substitúe ao programa Ciencia sen Fronteiras e que está orientada a fomentar a promoción de intercambios de mobilidade, estancias de investigación e proxectos conxuntos entre entidades de educación superior brasileira e doutros países.