O emprendemento na integración do mercado ibérico centrou unha xornada en Económicas

‘Emprendemento na integración do mercado ibérico’ é o título da conferencia que este mércores se desenvolveu en Ciencias Económicas da USC organizada pola Agrupación Europea de Cooperación Territorial Galicia-Norte de Portugal, o Instituto Camoes de Vigo e a propia Facultade, e cuxa inauguración presidiu a vicerreitora de Economía e Infraestruturas, Sara Cantorna. Asistiron tamén o presidente do Consello Social da USC, Manuel Puga; o director xeral de Relacións Exteriores e coa UE, Jesús Gamallo; e o director do Instituto Camoes, Samuel Rego. Deseguido comezou o primeiro dos paneis, dedicado ao emprendemento como motor de futuro, no que interveñeron o presidente do Consello da Universidade do Minho, Luís Braga da Cruz; o catedrático da Universidade de Vigo, Jorge González Gurriarán; e o profesor da USC David Rodeiro. Os tres analizaron a cooperación transfronteiriza entre España e Portugal, a crise e as medidas para afrontala e a creación de EBTs dende as universidades, os centros tecnolóxicos e as empresas.

A continuación tivo lugar o segundo e último panel, no que se presentaron casos de éxito no emprendemento en España e Portugal. Así, ademais dun relatorio da directora da Cátedra Bancaja Novos Emprendedores da USC, Loreto Fernández, coñecéronse as experiencias de BitOceans, premio á Iniciativa Empresarial Innovadora de Galicia, da Xunta e a USC; do Grupo Lágrimas Hotels & Emotions, considerado entre os 25 mellores hoteis e restaurantes do país pola Guía Expresso; de Imatia, gañador galego do Premio Empresa Nacional de Innovación que outorgan ENISA e La Caixa; e de Weadapt, gañador do Premio Nacional de Emprendemento Start promovido polo BPI, Optimus e a Universidade Nova de Lisboa.

A Conferencia contou coa participación de numerosos expertos en economía de España e Portugal