O Encontro Universitario de Danza arrinca a próxima semana coa presenza de grupos de México, Granada e Estremadura

Sete grupos de danza procedentes de distintas universidades españolas e americanas participarán a próxima semana en Lugo e Santiago na sétima edición do Encontro Universitario de Danza Contemporánea.
Este ano o encontro, dirixido e coordinado por Juan Carlos Zahera, abre as portas aos países iberoamericanos coa presenza do grupo do Instituto Tecnolóxico da Universidade de Monterrey de México. Tamén estarán presentes, ademais da USC co Espazo de Danza Universitario e a Compañía Traspédiante, as universidades de Granada, Estremadura e A Coruña. Xunto aos grupos universitarios, participará por vez primeira nesta edición o Conservatorio Profesional de Danza de Lugo.
O certame desenvolverase primeiro en Santiago, os días 20 e 21, con actuacións polas tardes na Igrexa Universitaria e pola mañá na explanada diante da cafetería do SEU no Campus Sur. Xa en Lugo, enmarcado no Convenio Lugo Cultural, o encontro terá lugar os días 22 e 23.
Campus de LugoCada un dos grupos ofrecerá a súa proposta coreográfica no marco da Sala dos Mosaicos do Museo Provincial de Lugo, onde actuarán o mércores 22, ás 20:30 horas, os grupos de Monterrey, Granada e Santiago de Compostela. O xoves, á mesma hora e no mesmo lugar, será a quenda do Conservatorio Profesional de Danza de Lugo, das universidades de Estremadura, A Coruña, e novamente da USC.
Como actividade complementaria, o xoves ás 13:00 horas, os distintos grupos ofrecerán un estrato das súas coreografías na rúa da Raíña. As tres actuacións están abertas a todo o público e son gratuítas.
Á marxe deste programa terán lugar tres talleres de danza-teatro, Parkour e malabares, impartidos por Carlota Pérez, Ángel Bueres e Celso Pereira, respectivamente.
O Encontro de Danza en Lugo presentárono en rolda de prensa este mércores a vicerreitora de Cultura, Elvira Fidalgo; o xefe de servizo de Creación e Difusión Cultural da Xunta de Galicia, Rafael Vizcaíno; o delegado da área de Cultura da Deputación Provincial, Antonio Veiga; e o responsable da Fundación Caixa Galicia, Sinesio Pérez. O programa foi explicado polo miúdo por parte do director do Espazo de Danza da USC e coordinador do Encontro, Juan Carlos Zahera.