Entrega dos premios do Concurso de Ideas para o deseño do cartel e da imaxe da USC na campaña do curso 2014-2015

O reitor Juan Casares entregará este martes 20 os premios correspondentes ao Concurso de Ideas para o deseño do cartel e da imaxe da USC na campaña do curso académico 2014-2015. A partir das 11.00 horas no Salón de Graos do Colexio de San Xerome, Daniel Candal Castro recibirá o primeiro premio pola súa proposta ‘Unha universidade para o futuro’ e Manuel Magán Abollo o accésit polo seu deseño ‘Alén do saber’. A proposta gañadora determinará a imaxe gráfica do material de difusión e promoción dos estudos da USC, como carteis, folletos ou web, entre outros. A esta convocatoria podía concorrer estudantado universitario e de ensino medio residente en Galicia e que curse estudos en calquera centro desta comunidade autónoma. O concurso contempla un primeiro premio cunha dotación económica de 1.000 euros e un accésit de 600 euros. Cada concursante podía presentar ata un máximo de dúas propostas de carteis, sempre orixinais e inéditas.