Entrega de premios do XIV Concurso de Ideas Empresariais Innovadoras da USC

Os cinco proxectos gañadores do XIV concurso de Ideas Empresariais Innovadoras da USC recibirán este venres 12 os seus galardóns nun acto que presidirá o reitor Juan Viaño ás 12:00 horas no Salón Reitoral do Colexio de San Xerome e ao que tamén asiste o conselleiro de Educación e Ordenación Universitaria, Xesús Vázquez. Participan ademais a subdirectora xeral de Promoción da Igualdade da Xunta de Galicia, Pilar García-Rodeja; o secretario xeral de Universidades, José Alberto Díez de Castro; a vicerreitora de Investigación e Innovación, Isabel Rodríguez-Moldes; a vicerreitora de Estudantes, Cultura e Responsabilidade Social, Dolores Álvarez; e o director do Programa Uniemprende da USC, Carlos Hernández Sande. Con este certame, ao que este ano se presentaron 343 ideas, a Universidade compostelá busca premiar aqueles emprendedores e emprendedoras que presenten as mellores ideas, orixinais e innovadoras, susceptibles de converterse en proxectos empresariais a curto e medio prazo. Dirixida a toda a comunidade universitaria galega de calquera das áreas de coñecemento, a iniciativa outorga cinco premios de 600 euros valorándose a viabilidade e factibilidade da idea, o carácter innovador, o grao de madurez, o mercado e a presenza das políticas de igualdade.