Entregados os galardóns do certame audiovisual ‘Móvete’

No marco das celebracións do seu 50 aniversario, o Instituto da Lingua Galega da USC (ILG) deu a coñecer os nomes das persoas gañadoras do seu concurso de vídeo Móvete, destinado a alumnado dos institutos de Galicia e das zonas de fala galega fóra da Comunidade Autónoma para incentivar o uso da lingua galega, así como para dar a coñecer a actividade do propio ILG. Os temas propostos para a creación de pezas audiovisuais foron ‘Móvete co galego’, ‘Conmóvete co galego’ e ‘Promove o galego’.

Na modalidade individual, resultaron premiados os traballos ‘Sete cuncas de galego’ de Lucía Argüelles Valverde (categoría ‘Móvete co galego’), ‘Terra sachada que se levou o vento’ de Miguel Casal Fernández (‘Conmóvete co galego’) e ‘Herdanza’ de Xoel Otero Nogueira (‘Promove o galego’). O premio para o mellor vídeo individual de cada tema consistiu nun teléfono móbil iPhone.  O xurado valorou a calidade e orixinalidade da peza, así como o uso creativo das tecnoloxías e das ferramentas empregadas. Ademais, outorgouse o premio do público a ‘Aprendendo con Vicente Risco’ da autoría de Xavier González Freire, quen recibiu unha tableta por elaborar o vídeo que máis interaccións obtivo en Twitter, Instagram e na canle de YouTube do ILG

Traballos en grupo

Na modalidade de traballos en grupo, foron recoñecidas as obras ‘Nós, movémonos co galego… E ti?’ do Colexio Manuel Peleteiro de Santiago de Compostela, ‘España gaña Eurovisión cunha canción en galego’ do Colexio Monterrey de Vigo e ‘Falar’ da autoría do Colexio Bilingüe Marcote de Mondariz-Balneario. O premio para o mellor vídeo en grupo de cada tema consistiu nunha videocámara. Os restantes finalistas recibiron un smartwatch (modalidade individual) e un lote de libros (modalidade de grupo).

Este certame está dirixido a alumnado que estea cursando 3º, 4º da ESO, 1º ou 2º de Bacharelato  e conta co apoio da Secretaría Xeral de Política Lingüística e a cadea de supermercados Gadis.