A Escola de Negocios Uniemprende desenvolverá un seminario sobre a Reforma do Plan Xeral Contable 2008

A Escola de Negocios Uniemprende organiza os vindeiros días 31 de xaneiro e 1 de febreiro un seminario sobre a ‘Reforma do Plan Xeral Contable 2008’ dirixido á membros da comunidade universitaria, xente da empresa, emprendedores e público en xeral. O prazo de preinscrición para esta acción formativa permanecerá aberta ata o próximo día 29.
Nas dúas xornadas en que se celebrará este seminario, os asistentes recibirán información sobre o Plan Xeral de Contabilidade para Pemes, outras normas mercantís que se verán afectadas pola aplicación do novo plan, e as normas de transición dende o plan de 1990 ao novo. O programa desenvolverase integramente na Aula de Formación do edificio CACTUS no Campus Sur o xoves, 21 de xaneiro, en horario de 9:30 a 14:30 e de 16:00 a 19:00 horas e o venres, 1 de febreiro, de 10:00 a 14:00 horas.
Cun eminente carácter práctico, as dúas sesións dos seminario serán impartidas por Fernando Martínez Valdueza, licenciado en Ciencias Económicas e Empresariais pola Universidade Complutense de Madrid e Senior Executive Program pola Escola de Negocios ESDEN.
Director xeral de varias empresas dos sectores da automoción e da formación, actualmente é consultor no campo das finanzas e a creación de empresas, tarefa que compaxina coa de director do Máster Executive en Administración Pública da Escola para as Administracións Públicas Caixanova, e profesor colaborador da Escola de Negocios da mesma entidade de aforro na área de Finanzas e Control.