A Escola Politécnica cubre as 100 prazas ofertadas nos cursos ponte para que os enxeñeiros adapten os seus títulos aos graos

A Escola Politécnica Superior do campus de Lugo cubre todas as prazas ofertadas nos cinco cursos ponte que se impartirán o vindeiro curso académico 2013-14 e a través dos que os enxeñeiros xa egresados poderán adaptar a súas respectivas titulacións aos novos graos ademais de acadar as novas competencias profesionais que inclúen.

O director da Escola Politécnica Superior, Javier Bueno Lema, salientou que os cinco cursos ponte ofertados para adaptar estudos aos graos de Enxeñaría Agrícola e do Medio Natural, Enxeñaría Civil, Enxeñaría das Industrias Agroalimentarias, Enxeñaría en Xeomática e Topografía, e Enxeñaría Forestal e do Medio Natural, rexistraron este ano máis solicitudes das prazas ofertadas este ano, o segundo que se organiza este itinerario formativo como vía para homologar os vellos títulos aos novos graos do Espazo Europeo de Ensino Superior. A maior parte dos solicitantes preinscritos nos cursos ponte programados pola EPS son titulados xa egresados da Universidade de Santiago, aos que se dá prioridade no proceso de matrícula. Aínda así, o centro universitario lugués tamén recibe solicitudes de enxeñeiros técnicos titulados noutras universidades, segundo indicou o profesor Bueno Lema. A actividade formativa dos cursos ponte impartidos o vindeiro curso na Escola Politécnica Superior do campus de Lugo comezarán a desenvolverse o 13 de setembro. Estes programas, estruturados en 60 créditos ECTS, teñen carácter semipresencial. A docencia expositiva desenvolverase a través do campus virtual da USC, mentres que a docencia interactiva terá lugar nas dependencias da propia EPS os venres.