A Escola Politécnica Superior agasalla os novos estudantes de primeiro curso cunha guía informativa sobre o centro

A Escola Politécnica Superior do Campus Terra da USC ofreceu este luns un acto institucional de benvida ao novo alumnado matriculado no primeiro curso das distintas titulacións ofertadas pola USC neste centro universitario lugués, no marco do que agasallou aos estudantes cunha guía informativa do curso académico 2016-2017. O documento, a través do que o equipo de dirección da EPS pretende achegar de xeito individualizado a máxima información do funcionamento do centro universitario aos novos estudantes e que leva por título ‘ Guía do Estudante da EPS’, antóllase coma un completo compendio de información e asesoramento sobre a EPS, personal, servizos, oferta e calendario académico, infraestruturas... O director da EPS, Tomás Cuesta García, que presidiu esta sesión de benvida ao estudantado de primeiro curso, aproveitou a recepción para tratar de familiarizar ao novo alumnado co centro universitario, así como seu equipo de dirección, profesorado e demais persoal do centro. A presentación do persoal da EPS, desde os membros que integran o actual equipo de dirección, ata os que desenvolven o seu cometido na conserxería, centra tamén as primeiras páxinas da ‘Guía do Estudante da EPS’, un documento que informa tamén do calendario académico, instalacións da escola e recursos materiais dispoñibles, horarios, organización académica, representación do estudantado nos órganos de goberno, programa de alumnos titores, Biblioteca Intercentros, medios de información, campus virtual, correo institucional, normativa e permanencia e avaliación da USC, apoio titorial extraordinario, programas de intercambio e prácticas externas, traballos de fin de grao e fin de máster, así como respecto do sistema de garantía interna de calidade da EPS.