Especialistas en mecánica celeste reúnense estes días en Lalín

Máis de 50 especialistas en mecánica celeste, unha rama da astronomía e das matemáticas, reúnense estes días en Lalín na súa reunión científica anual na que participan tamén destacados membros da comunidade internacional. As XII Xornadas de traballo en mecánica celeste foron inauguradas este mércores polo vicerreitor adxunto de Investigación e Política Exterior, Jesús Casabiell.
O encontro, organizado polo Observatorio Astronómico Ramón María Aller da USC dentro das actividades do Ano Internacional da Astronomía, transcorren no Museo Aller de Lalín, onde hai case cen anos Ramón María Aller iniciou a investigación astronómica en Galicia.