Especialistas de Oxford asesorarán a USC para mellorar o proceso de transferencia de coñecemento cara á empresa

Persoal técnico de ISIS Innovation, a Unidade de Transferencia da Universidade de Oxford, visitan estes días a USC para asesorar a institución compostelá na definición e lanzamento dun Fondo de ‘Proba de concepto’ na Universidade de Santiago. O obxectivo é activar o proceso de transferencia de coñecemento dende a investigación universitaria cara á empresa e tratar de cubrir a etapa crítica para facilitar así a inversión privada en desenvolvemento e innovación. Como indica o director da Área de Valorización, Transferencia e Emprendemento da USC, José L. Villaverde, a etapa de `proba de concepto’ resulta “imprescindible para atraer o interese da empresa”. A inexistencia de financiamento dispoñible para este tipo de accións, que moitas veces esta fóra do ámbito de interese académico, é outra razón esgrimida por Villaverde. Isis Innovation aconsella a creación do fondo para, entre outros asuntos, obter retorno económico das inversións realizadas a través de proxectos e spin-offs. Ao longo de todo este ano asesorarán a USC no deseño do fondo e da estratexia de investimento e acompañarana na fase de lanzamento dos primeiros proxectos que se presenten e avalíen. Acompañados de Villaverde, Alberto Rodríguez e Diego Suárez, todos eles da USC, as persoas integrantes de Isis Innovation, con dez anos de experiencia neste campo, foron recibidos polo reitor Juan Casares no seu despacho de San Xerome. O grupo está integrado por Sarah Macnaugton, Elena Andonova e Manuel Fuertes.