Espello Cóncavo e a compañía de teatro USC Lugo presentan na Casa do Saber ‘Romano’, un retrato de época de Lino Braxe

A compañía Espello Cóncavo e membros da compañía de teatro USC-Lugo presentarán este luns, a partir das 20.30 horas, no auditorio da Casa do Saber ‘Romano’, unha obra escrita, dirixida e interpretada por Lino Braxe que chega a Lugo logo de xirar por diversos escenarios de Italia e España.

A xeito de preludio do ‘Arde Lucus’, a estrea de ‘Romano’, un complexo drama poético non exento de intrigas, traizóns, amores, envelenamentos, detencións políticas e até o arrecendo de guerras, permitirá ao público lugués viaxar a través da historia para achegarse e coñecer a vida e a sociedade no imperio romano e incluso o nacemento do cristianismo.

A través da figura dun senador romano, acompañado doutros personaxes, Lino Braxe aborda nesta obra o retrato dun home e dunha época convulsa de fonda pegada no pasado e na historia romana de Lugo. A entrada para poder presenciar esta montaxe teatral e libre de balde para todas as persoas interesadas ata completar o aforo do auditorio da Casa do Saber.