A estabilización e promoción do profesorado progresa coa convocatoria dun cento de prazas docentes

A aprobación da convocatoria de preto dun cento de prazas de profesorado, 50 de catedrático/a e 43 de profesorado titular, permitirá progresar na promoción do profesorado acreditado para estas figuras docentes na USC. Esta foi unha das cuestións abordadas na xuntanza do Consello de Goberno deste venres 28 e na que tamén se deu luz verde ás comisións de selección correspondentes. Esta medida atópase en consonancia co establecido nas Bases para a Planificación de Profesorado 2023, nas que se define non só o obxectivo de renovar e rexuvenecer o cadro docente, senón tamén contribuír á estabilización do PDI.

No caso das prazas de titular, cinco están reservadas para persoal investigador do programa Ramón y Cajal e doutros programas de excelencia estatais e internacionais. Do medio cento de prazas para catedrático/a, catro son de quenda libre e 46 de promoción interna. Ademais, continuando co capítulo de persoal, aprobáronse prorrogas de profesorado asociado no eido de Ciencias da Saúde e modificouse a Relación de Postos de Traballo do Persoal de Administración e de Servizos.

No relativo ás titulacións, a xuntanza abordou a memoria do mestrado propio en Dirección e Xestión do Comercio Exterior, así como os regulamentos dos traballos fin de grao en Bioloxía e Biotecnoloxía.

Vulnerabilidade

As situacións excepcionais dos últimos anos puxeron de manifesto  a necesidade de reforzar as medidas para atender situacións de emerxencia social dos membros da comunidade universitaria, moi particularmente do estudantado. Baixo esta premisa, o Consello de Goberno acordou propoñer ao Consello Social a aprobación dun crédito extraordinario para atender as necesidades urxentes de membros da comunidade universitaria que se atopen nunha excepcional situación de vulnerabilidade e que carezan dos medios precisos para facer fronte a elas.

Esta acción engádese ás xa desenvolvidas en colaboración con outras institucións como Mujeres Por África ou a Fundación Carolina. Ademais, nos últimos tempos, téñense incrementado  notablemente  as  convocatorias  de  axudas  destinadas  a  membros da comunidade universitaria que por diversas razóns se teñen atopado nunha situación de vulnerabilidade. Non obstante, as medidas que a universidade pode adoptar, como administración pública que é, esixen a tramitación de procedementos que impiden en moitas ocasións dar resposta ás necesidades máis básicas coa velocidade que requiren certas situacións excepcionais, razón pola cal se procede á aprobación do devandito crédito.

Videovixilancia

O Consello de Goberno tamén aprobou o novo protocolo sobre o uso de instalacións de videovixilancia na USC coa vontade de adaptarse ao cumprimento das normas de protección de datos de carácter persoal e coa finalidade de determinar, de acordo coa lexislación máis recente, os procedementos para a instalación de cámaras, os seus requisitos e o seu uso.

Outros asuntos

A aprobación da renovación da Comisión de atención a situacións de acoso sexual, acoso por razón de sexo, orientación sexual e identidade de xénero; a declaración do carácter excepcional e singular de solicitudes de subvencións obxecto de convenio para financiamento de actividades pola Deputación Provincial da Coruña; convenios e asuntos económicos completaron a orde do día.