Estudantes da USC, subcampións no X Torneo de Debate Universidade Francisco de Victoria

O equipo de estudantes da USC da Asociación Galega de Debate (Agade) proclamouse subcampioa en Madrid no X Torneo de Debate Universidade Francisco de Victoria, o decano neste tipo de certames en España. Durante tres días o equipo da USC cruzou argumentos acerca do Islam como cultura potencialmente democrática cos das principais universidades españolas, proclamándose vencedores de todos os enfrontamentos ata chegar á final, onde se impuxo a Universidade Pontificia Comillas. O grupo que acadou ese segundo posto está formado polo capitán Iván Olmos, estudante de 3º Comunicación Audiovisual e Ciencias Políticas; Lidia Lareo, de 2º de Xornalismo; Manuel Soto, de 5º de Medicina e David Garrote, de 4º de Psicoloxía. Todos eles son membros ademais do Club de Debate Compostela da USC. Agade A Asociación Galega de Debate (Agade) naceu a comezos de 2014 co obxectivo de promover as actividades relacionadas coa oratoria e o debate de competición en Galicia en todos os ámbitos. Precisamente a súa non vinculación á Universidade confírelle un carácter único en España como asociación de debate.