Estudarán nun simposio a metodoloxía de traballo Aprendizaxe-Servizo para aplicar nas universidades galegas

Analizar as posibilidades da Aprendizaxe-Servizo no marco do Espazo Europeo de Educación Superior (EEES) e promover o seu coñecemento nas Universidades de Galicia é o principal obxectivo dun simposio que terá lugar o vindeiro día 27 na EGAP. O encontro está organizado en colaboración coa rede de excelencia ‘Universidade, Innovación e Aprendizaxe na Sociedade do Coñecemento’ que coordina o catedrático da USC, Miguel A. Santos Rego, director do grupo de investigación Esculca e da Rede RIES na que se integran as tres universidades galegas. No I Simposio Internacional sobre ‘Aprendizaxe-Servizo na Educación Superior: Innovación, Calidade e Institucionalización’ participarán os tres vicerreitores das universidades galegas con competencias en materia de calidade e docentes que presentarán proxectos e experiencias que se están a desenvolver con esta metodoloxía de traballo no Sistema Universitario Galego.