Expertos veterinarios de prestixio internacional abordarán en Lugo a neuroloxía e os coidados intensivos nos animais

O vindeiro martes 4 de maio remata o prazo para inscribirse na primeira edición das Xornadas en Medicina Veterinaria: Neuroloxía e coidados intensivos, que se desenvolverán no Auditorio da Facultade de Veterinaria de Lugo dende o 7 ao 9 de maio.
Esta actividade, organizada polo Departamento de Ciencias Clínicas Veterinarias da USC e a Sociedade Española de Medicina Interna (SEMIV), diríxese principalmente a estudantes e licenciados en Veterinaria co obxectivo de que poidan actualizar e revisar os seus coñecementos en dúas das especialidades con máis desenvolvemento nos últimos anos.
Os relatorios correrán a cargo de Raquel Frances-Borrell e Lluis Gaitero Santos, do Hospital Veterinario da Facultade de Ontario (Canadá), e Sergio Ródenas González, membro dos Especialistas veterinarios dos condados do sur de Inglaterra.
Nas súas intervencións, estes expertos veterinarios abordarán temáticas como o manexo e tratamento con monitores do paciente hospitalizado, os diferentes casos de convulsións e estados epilépticos, doenzas ou trastornos como traumatismos cranial ou espiñal, as afeccións do sistema nervioso periférico, o síndrome vestibular, a enfermidade discal aguda ou diferentes doenzas inflamatorias.