Exploran nun curso de verán en Porto do Son cómo mellorar as relacións familiares

‘ Psicoloxía e Educación: como mellorar as relacións familiares’ é o título do curso de verán que entre os días 13 e 15 de xullo se desenvolverá na Casa da Cultura de Porto do Son organizado pola profesora Carmen del Río Nieto. O prazo de inscrición neste curso remata o 1 de xullo.

No primeiro día do encontro participarán a decana do Colexio Oficial de Psicoloxía de Galicia, Mª Rosa Álvarez Prada, cun relatorio no que explicará cómo está integrada a psicoloxía no Servizo Galego de Saúde, e a psicóloga do Concello de Porto do Son, Crsitina Fontaina, que contará experiencias en intervención psicosocial desde os municipios.

Na sesión da tarde dese día comezará un espazo dedicado a casos prácticos de menores en conflito, que inaugurará o psicólogo da Fiscalía de Menores da Comunidade de Madrid, Javier Urra, coa charla ‘O pequeno ditador. Cando os pais son as vítimas’ e continuará a investigadora da Universidade de Granada Teresa Ramiro falando de adolescencia e sexualidade.

A mesma Ramiro continuará na mañá do día 14, para dar logo paso a outra charla sobre avaliación e intervención en déficit de autoestima con adolescentes a cargo da profesora Mª Paz Bermúdez, tamén de Granada. A xornada dese día rematará co presidente da Asociación Española de Psicoloxía Condutual, Gualberto Buela Casal, que falará da intervención psicosocial en conduta antisocial con adolescentes.

Cómo axudar aos adolescentes e país e nais que se senten perdidos, o programa Vincúlache e diversas claves para axudar a nenos e mozos a superar un trauma complexo serán as tres temáticas a tratar na última sesión, na que participarán a directora Centro de Psicoloxía Álava-Reyes de Madrid, Mª Jesús Álava Reyes, e o director da Escola Nacional de Formación Academia SOS. José Manuel Morell.