A Facultade de Ciencias do Campus de Lugo acollerá o XVI Congreso da Sociedade Galega de Prevención de Riscos Laborais

A Facultade de Ciencias do Campus de Lugo acollerá do día 20 ao 22 de setembro o XVI Congreso da Sociedade Galega de Prevención de Riscos Laborais que foi presentado este luns en roda de prensa.
Ao acto de presentación acudiu o vicerreitor de Coordinación do Campus, Carlos Herrero Latorre; o presidente do comité organizador e profesor do Departamento de Saúde Pública da Facultade de Medicina da USC, Carlos Quintas; o decano do Colexio Oficial de Enxeñeiros Técnicos Industriais de Lugo, Jorge Rivera; e o presidente do consello de administración de Medicine Cabinet Services, Jorge Dorigo, entidade que patrocina o congreso.
Carlos Herrero destacou o importante labor da Facultade de Ciencias neste eido dado que entre a súa oferta de formación destaca o Programa Oficial de Posgrao en Riscos Laborais, "razón pola cal a presenza da USC neste congreso é -segundo manifestou- inexcusable". Pola súa banda, o profesor Quintas explicou que a visión multiprofesional das xornadas fai que expertos de diferentes ámbitos participen no proceso de mellora das condicións de seguridade laboral.
O programa inclúe mesas de traballo sobre diferentes aspectos como a hixiene industrial, o tabaco, a dermatose por plantas e flores ou as vacinas, entre outros. A organización do congreso ten previsto ademais unha serie de actividades paralelas con visitas guiadas a diferentes zonas da provincia.