A Facultade de Humanidades acolle este mércores a presentación do número 24 da revista cultural ‘Evohé’

A decana da Facultade de Humanidades, María Isabel González Rey; a vicexerenta do campus de Lugo, Carmen Varela, e o profesor do Departamento de Literatura Española da USC, Claudio Rodríguez Fer, presentarán este mércores, a partir das 12.00 horas, no salón de graos do devandito centro universitario, o número 24 de ‘Evohé’, unha revista cultural do campus de Lugo.

O último número desta publicación, fundada no ano 1997 polo alumnado da Facultade de Humanidades co obxectivo de servir de lugar de encontro e expresión dos/as estudantes universitarios/as do campus lugués, está coordinado polas estudantes Cristina Fiaño e Sandra López. Respecto dos contidos, a última entrega desta publicación, que vén de saír do prelo, pretende servir de particular homenaxe ao escritor arxentino Julio Cortázar, co gallo do 50 aniversario da publicación de ‘Rayuela’, unha das súas obras máis coñecidas.