Farmacia e Enfermaría, próximos destinos da unidade móbil de doazón de sangue

Farmacia e a escola de Enfermaría son os próximos puntos do Campus de Santiago nos que o Centro de Transfusión de Galicia vai emprazar a súa unidade móbil.
Na Facultade de Farmacia, a unidade situarase diante deste centro universitario o luns 8 e o martes 9 en horario de 9:30 a 14:30 e, pola tarde, de 15:30 a 21:00 horas. Xa no Campus Norte, a cita é o mércores 10 na Escola de Enfermaría con semellante horario.
Primeira faseNa primeira fase desta campaña no actual ano académico, que se desenvolveu dende outubro ata decembro, houbo un total de 1.482 doazóns na USC, 1.186 no Campus de Santiago e 296 no de Lugo.
Estas campañas que se desenvolven na Universidade convértense cada ano no punto de entrada de moitos novos doadores. A día de hoxe, a contribución universitaria achega ao redor do 10% das necesidades de Galicia, onde se estima que este ano se precisarán 125.000 doazóns para cubrir toda a demanda dos hospitais galegos.