Gapavet, referente na formación de especialistas sobre o peixe cebra a nivel mundial
O peixe cebra (Danio rerio) conta cunha notable homoloxía co xenoma humano, feito que converte esta especie tropical de auga doce nun modelo indispensable para a investigación biomédica. Por este motivo, a Facultade de Veterinaria afonda nas diferentes técnicas de seguimento e diagnóstico aplicadas ao seu estudo, garantindo así o seu benestar e optimizando os resultados das investigacións que dependen deste modelo biolóxico. A formación que neste eido imparte o grupo de investigación Anatomía Patolóxica Veterinaria (GAPAVET) contribúe á capacitación do persoal investigador, proporcionándolle os coñecementos e habilidades necesarios para a correcta manipulación e análise desta especie, fortalecendo así a calidade e rigor dos estudos científicos que a utilizan.
O curso ‘University Microcredential in Zebrafish Health & Management in Research’ é unha iniciativa “de gran valor tanto a nivel nacional como internacional, promovendo a adquisición de habilidades prácticas fundamentais”, explican Ana Manuela De Azevedo Gomes e Roberto Bermúdez Pose, responsables desta acción formativa que sitúa Veterinaria como referente internacional na formación arredor do peixe cebra. Desde a administración de anestesia e eutanasia ata a observación clínica e a correcta toma de mostras, esta acción permite ás persoas participantes aplicar estes coñecementos en contextos reais, tanto clínicos como de investigación.
Sinerxías mundiais
O curso destaca pola participación dun dos máis reputados expertos en patoloxía do peixe cebra a nivel mundial, Michael Kent, investigador do departamento de Microbioloxía e Ciencias Biomédicas da Oregon State University. O profesor Kent conta cunha ampla experiencia en saúde e patoloxía do peixe cebra en instalacións de investigación e mantén unha colaboración estreita co Centro Internacional de Recursos do Peixe Cebra (ZIRC), unha das maiores instalacións especializadas nesta especie no seu país.
A organización e a docencia práctica recaeron no profesorado do grupo de investigación Gapavet, especializado en benestar animal e saúde de animais acuáticos, pertencente ao Departamento de Anatomía, Produción Animal e Ciencias Clínicas Veterinarias da Facultade de Veterinaria. Este curso conta coa participación de estudantado de diferentes partes de España e do Reino Unido e insírese dentro da estratexia de internacionalización do grupo. Coa realización desta actividade o equipo de traballo reforza o seu compromiso coa formación global e coa colaboración con especialistas de referencia a nivel mundial, fortalecendo as redes de investigación. O curso está tamén cofinanciado pola Deputación Provincial de Lugo, contribuíndo a situar a Provincia de Lugo como un referente dentro do panorama académico internacional no ámbito da investigación biomédica.