Grupos de investigación de Campus Vida reúnense esta tarde (martes 12) con asociacións de empresarios galegos no exterior

Varios grupos de investigación punteiros do Campus Vida da USC, co reitor Juan Casares á cabeza, manterán este martes 12 un encontro con asociacións de empresarios galegos de Arxentina, México, Portugal, República Dominicana, Brasil, Uruguai, Venezuela e Estados Unidos, así como de Aragón, Cataluña e Madrid. A xuntanza ‘O valor de investigar’, que dará comezo ás 16.00 horas no Cactus (Campus Vida), iniciarase cunha benvida do reitor e a proxección dunha videorreportaxe, aberta a debate, realizada por persoal investigador e partners sobre a capacidade da USC de xerar valor empresarial, económico e social. O encontro rematará cunha visita á Rede de Centros Singulares de Investigación, nomeadamente ao CiTIUS, CiQUS e CiMUS.