O Ibader celebra na Casa do Saber un acto polo 25 aniversario da aprobación da Directiva Hábitats e da creación do programa Life

O Instituto de Biodiversidade Agraria e Desenvolvemento Rural (Ibader) do Campus Terra da USC organiza este venres 9 de xuño, a partir das 18.00 horas, no auditorio da Casa do Saber de Lugo, un acto polo 25 aniversario da aprobación da Directiva Hábitats (DC 92/43/CEE) e da creación do programa LIFE.

A sesión, de asistencia libre, servirá para analizar e avaliar os resultados conseguidos e os progresos alcanzados neste tempo. Ademais, durante este evento tamén se fará unha exposición dos catro últimos proxectos Life do Campus Terra da USC, no marco do que se presentarán os seus resultados esperados, beneficios ambientais producidos e coñecemento xenerado.

O evento, que estará presidido polo vicerreitor de Desenvolvemento Científico e Tecnolóxico do campus de Lugo, Andrés Barreiro, contará tamén coa presenza do concelleiro do Concello de Lugo delegado da área de Desenvolvemento Sostible e Pesoal, Daniel Piñeiro; a deputada provincial Sonsoles López Izquierdo, ademais da representantes da Consellería de Medio Ambiente da Xunta de Galicia e do Programa Life da Comisión Europea.

Logo da quenda de intervencións iniciais, o vicerreitor Andrés Barreiro cederá o uso da palabra a membros dos catro últimos proxectos Life desenvolvidos no Campus Terra, tales como o son Pablo Ramil, por Life Tremedal; Paz Ondina, con Life Margal Ulla; Antonio Rigueiro, como representante do Life Lugo+Biodinámico, e Javier Ferreiro da Costa, por Life Baccata.