O III Foro de Emprego da USC busca facilitar a inserción laboral dos seus estudantes

A Universidade de Santiago desenvolve o seu terceiro Foro de Emprego este martes e o mércores 25 na Facultade de Ciencias Económicas e Empresariais e o día 26 na de Administración e Dirección de Empresas do Campus de Lugo.
A inauguración oficial do Foro tivo lugar nun acto no que interviñeron os vicerreitores de Comunidade Universitaria e Compromiso Social e de Oferta Docente e Espazo Europeo de Educación Superior, José M. Mayán e Máximo Pló; a directora xeral de Formación e Colocación, Ana Mª Díaz; o concelleiro da Oficina de Promoción Económica do Concello de Santiago, Xosé Manuel Iglesias; o secretario xeral de Universidades, José Alberto Díez de Castro; o xefe do Servizo de Apoio e Orientación aos Estudantes Universitarios, Xosé Luis Villar, o director do IGAPE, Joaquín Varela; o director de FEUGA, Francisco Javier Pereiro; e a decana da Ciencias Económicas e Empresariais, Maite Cancelo.
Empresas como Caixa Galicia, Caixanova, Indra, Deloitte, SPR Abogados ou Kiabi daranlle a oportunidade aos universitarios de deixarlles os seus currículos e de coñecer directamente o que estas firmas buscan nos seus candidatos. Concretamente, a empresa Kiabi vai desenvolver unhas dinámicas de grupo dentro do proceso de selección que ten actualmente aberto.
O III Foro de Emprego da USC conta co patrocinio da Consellaría de Educación e Ordenación Universitaria e da Deputación da Coruña. Ademais, a Oficina de Promoción Económica do Concello de Santiago e a Fundación ONCE participan como entidades promotoras. Salientar ademais a presenza neste evento do Concello de Lugo, o IGAPE, FEUGA e o INLUDES.
Durante o desenvolvemento do foro, tanto no campus de Santiago como no de Lugo, están programadas diversas conferencias e presentacións de empresas. Todas estas actividades están encamiñadas a proporcionar aos universitarios recursos de utilidade cara á súa incorporación ao mercado laboral.