Inauguración da exposición ‘Miradas de marfil’, do fotógrafo Marcos Rodríguez

O carballés Marcos Rodríguez inaugura este venres, 1 de xuño, na USC a mostra ‘Miradas de Marfil’ na que, da man da ONG Égueire, presenta o seu proxecto máis emocional, desenvolvido entre novembro e decembro en Costa de Marfil.

A inauguración da exposición, na que retrata as xentes do país africano captando de xeito especial as súas olladas, terá lugar ás 19.30 horas no claustro alto do Colexio de Fonseca.

A cámara de Marcos Rodríguez, fotógrafo titulado e distinguido pola Federación Española de Fotografía (Fepfi), foi durante todos estes anos testemuña do devir social e cultural da súa comarca, pero o seu traballo foi tamén recoñecido estatal e internacionalmente. Así, acadou a Medalla de Prata no Mundial de Fotografía WPC, World Phothographic Cup en 2015 ou a ‘Cámara de Ouro’ que lle outorga o título de Mellor Fotógrafo Europeo do ano en Reportaxe gráfico 2017, galardón que volveu revalidar este ano.

Foi ademais xefe de fotografía no semanario O Acontecer e traballou como fotógrafo de El Ideal Gallego, El Diario de Bergantiños, Deporte Campeón, Que pasa na Costa e La Voz de Galicia. De 2007 a 2017 realizou varias exposicións con retratos das xentes da súa comarca, en solitario ou montaxes colectivas, ata que marchou ao país africano a embarcarse neste interesante proxecto.