Inaugúrase este martes o Curso de Frío Industrial na Escola Politécnica Superior do Campus de Lugo

A USC inaugura un Curso de Frío Industrial no que están matriculados un grupo 29 titulados e estudantes universitarios de primeiro e segundo ciclo de carreiras técnicas, especialmente das titulacións de Enxeñaría Técnica Agrícola, na especialidade de Industrias Agrarias e Alimentarias, Enxeñaría Agronómica e Enxeñaría Técnica Industrial, que comezarán este martes 10 as dúas primeiras sesións deste curso, organizado pola Escola Politécnica Superior (EPS), a Facultade de Ciencias, ambas as dúas do Campus de Lugo, e o Grupo Cofrico.
As clases, que se desenvolverán na EPS, comezarán logo do remate do acto inaugural previsto para as 18:00 horas na Sala de Xuntas da Escola e que estará presidido polo vicerreitor de Coordinación do Campus de Lugo, Carlos Herrero. Nesta sesión de apertura participarán tamén o director da EPS, Javier Bueno; o decano da Facultade de Ciencias, Francisco Fraga; o xerente do Grupo Cofrico, José Luis Fernández, e o coordinador do curso José Manuel Magide.
O obxectivo deste curso, cunha duración de 30 horas e que se prolongará ata o 23 de abril, é formar a especialistas no ámbito da tecnoloxía do frío, dar a coñecer as instalacións frigoríficas e os seus dispositivos e a aprendizaxe da regulación e do control de instalacións frigoríficas.
O cadro docente do curso está formado polos profesores da USC, Enrique Arbones, Julio Gómez e José Manuel Magide, e por técnicos do Grupo Cofrico e doutras firmas comerciais.