A investigadora Paula Refojo, premiada pola Fundación Mutualidade por un traballo sobre a propiedade intelectual dos escritos forenses
A investigadora da área de Dereito Mercantil Paula Refojo Otero acadou o primeiro posto nos XIII Premios á Excelencia Cátedra Fundación Mutualidade polo seu traballo ‘A problemática da propiedade intelectual sobre os escritos e informes elaborados polos avogados’. O tema do seu estudo resulta de especial interese para os profesionais da avogacía e trátase dunha materia que, malia a súa transcendencia e actualidade, non ten sido obxecto dun tratamento doutrinal e xurisprudencial exhaustivo. O acto público de entrega do premio terá lugar en Madrid o vindeiro 29 de outubro.
No traballo premiado estudáronse as principais cuestións que suscitan os escritos forenses dende o punto de vista da propiedade intelectual, especialmente en relación co nacemento da protección e as implicacións da utilización dos sistemas de intelixencia artificial, a autoría da obra así como a titularidade e o alcance dos dereitos que xorden da propiedade intelectual.
Paula Refojo Otero é graduada en Dereito pola USC, con premio fin de carreira concedido pola Xunta de Galicia, e Mestrado Universitario en Avogacía e Procuradoría. Na actualidade atópase elaborando a súa tese de doutoramento baixo a dirección dos profesores Ángel García Vidal e María del Mar Maroño Gargallo.