Unha investigadora da USC explica en México cómo eliminar grafitis no patrimonio de maneira biolóxica

A investigadora Patricia Sanmartín, do Grupo de estudos medioambientais aplicados ao patrimonio natural e cultural da USC, participa estes días como relatora na Universidade de Campeche (Mexico) cuns seminarios sobre o deterioro do patrimonio, cómo alargar a súa vida útil e a utilización de opcións biolóxicas na limpeza dos grafitis. Para a investigadora da USC esta colaboración permitirá crear sinerxías entre grupos de investigación que traballen no tratamento e estudos de biofilms e películas nas ruínas maias e monumentos, así como cooperar no proxecto Bioremograf dirixido á eliminación de grafitis no patrimonio utilizando microorganismos. A investigadora Patricia Sanmartín acode ao país mexicano dende a Universidade de Harvard (EEUU) onde durante todo este ano traballa cun contrato da Xunta do Plan I2C co grupo de microbioloxía aplicada ao patrimonio histórico e artístico baixo a supervisión do profesor Ralph Mitchel. A comezos de setembro viaxará á Universidade de Milán, onde traballará un curso para logo volver á USC en 2015. Licenciada en Química pola USC, comezou a súa traxectoria investigadora en 2003 cun proxecto fin de carreira orientado á conservación preventiva e restauración de arte contemporánea. En 2012 doutorouse con Mención europea e «cum laude» pola Universidade de Santiago coa tese ‘Cuantificación da cor no estudo da formación de biofilms en rocas graníticas do Patrimonio histórico artístico’ e ese mesmo ano recibiu a bolsa de posgrao no estranxeiro da Fundación Barrié. A súa traxectoria investigadora foi premiada en dúas ocasións, na conferencia especializada sobre biofilms que tivo lugar en 2009 na Universidade de Davis (EEUU) e no último congreso español de cor na Universidade de Alacante en 2010.