María Dolores Villanueva presenta a súa última obra A lingua galega entre 1963 e 1975

A investigadora do Instituto da Lingua Galega María Dolores Villanueva Gesteira presentará este venres 28 ás 20:00 horas no Arquivo da Deputación de Pontevedra (r/ Padre Amoedo, 1) o seu libro A lingua galega entre 1963 e 1975. Situación social e discursos dende o galeguismo, obra premiada en 2008 pola Deputación de Pontevedra na categoría de ‘Novos Investigadores’ dos seus premios de investigación. O libro presenta a situación lingüística e social do galego durante o período final da ditadura franquista. Segundo explica a súa autora, o traballo presentado parte do punto de vista do galeguismo para ir anoando a reconstrución das institucións políticas e civís, que chegada a democracia serían de suma importancia como punto do que partir para seguir conformando a identidade do país. O estudo pretende mostrar a efervescencia dun período de tempo cheo de iniciativas que prenden neste momento e agroman máis tarde no período constitucional.