A do martes ao mércores, a noite máis cálida dos últimos 20 anos

A pasada noite en Compostela os termómetros rexistraron 22º9, a temperatura mínima máis alta dende o 20 de agosto de 1993 (con 23º9), segundo datos do Observatorio Astronómico Ramón María Aller da USC. Deste xeito, aínda que a temperatura máxima acadada este martes (35º7) na cidade non corresponde a ningún récord histórico, a pasada foi das noites mais cálidas que se recordan. Nos últimos 22 anos só en oito ocasións a temperatura mínima foi superior a 20º, concentradas nos anos 1990 e 2006: o 22 de xullo de 1990 (21º9); o 17 de xullo de 2006 (21º6); o 23 de xullo de 1990 (21º1); o 16 de xullo de 2006 (21º0); o 7 de agosto de 2006 (20º6); o 8 de agosto de 2006 o (20º6); o 5 de setembro de 2006 (20º6) e o 21 de xullo de 1990 (20º1). En canto ás temperaturas máximas, tamén segundo datos do Observatorio universitario, nos 30 últimos anos as máis altas foron os 40º3 do 20 de xullo de 1990; os 39º7 do 12 de agosto de 2003; os 38º7 do 17 de xullo de 2006 e do 8 de agosto de 2003; e os 38º5 dos días 19 de xullo e 4 de agosto de 1990 e 7 de agosto de 2003. Próximo a estes rexistros, o 25 de xuño de 2011 o termómetro chegou en Compostela a 36º9.