Un dos marzos menos chuviosos
A estación metereolóxica do Observatorio Astronómico Ramón María Aller da USC recolleu o pasado mes 143,1 litros/m², situándose este mes por debaixo da media dos marzos deste século na cidade de Santiago de Compostela, que está en 200 l/m². A meirande parte da precipitación mediuse na primeira semana do mes con 106 l/ m².
En total, foron quince os días nos que nalgún momento choveu en Santiago, malia que por enriba dos 5 l/m² só houbo nove xornadas. Noutras tres a precipitación estivo por debaixo de 1l/m², e noutras dúas xornadas resultou inapreciable con menos de 0,1 l/m². Destacan os 50,4 l/ m² do día 1 do mes.
"Aínda que a media está en 200 l/m², o certo é que existe unha gran dispersión entre os diferentes anos. Así o marzo máis chuvioso fora aquel de 2001 no que en 30 días caeran 618 l/m², ou o do 2006 con 477 l/m². No lado oposto están os marzos de 2009 (40 l/m²) e de 2012 (41 l/m²). A finais do século pasado cómpre lembrar o marzo de 1997 no que houbo só precipitación inapreciable", explica o director do Observatorio José Ángel Docobo Durántez.
No referente ás temperaturas, o mes recentemente rematado reportou unha máxima de 23º5 o día 18, e unha mínima de 2º8 o 31 de marzo. Noutros anos como 2002 (28º6), 2005 (27º2), 2012 (27º0), as máximas foran moito máis xenerosas, incluso con varios rexistros por riba de vinte graos. Resultaron inusualmente cativas as máximas dos derradeiros días do mes, con só 10º7 (día 30) e 9º8 (día 31). "Pero isto non é novo xa que logo o 30 de marzo de 2018 a máxima fora xa da mesma orde (9º5)", explica Docobo.
As temperaturas mínimas negativas en marzo non se miden dentro da cidade de Santiago dende 2013. Neste senso destacan os -4º2 do día 2 de marzo de 2005. Naquel mes tamén houbera mínimas baixo cero noutras catro xornadas máis. "Neste marzo de 2020 é salientable asemade o episodio de calima vivido entre os días 18 e 20, día este no que de madrugada caeu chuvia con barro. Rexistrouse tamén sarabia na tarde do día 15 e na mañá do 16", conclúe Docobo.