Matemáticas engrosa o seu fondo bibliográfico coa biblioteca científica persoal de Enrique Vidal Abascal

A familia do que foi docente, impulsor e primeiro decano da Facultade de Matemáticas, Enrique Vidal Abascal (Oviedo, 1908 - Santiago, 1994), doou ao centro a súa biblioteca matemática particular, que presentaron este mércores a decana Victoria Otero Espinar e o profesor Xosé María Masa Vázquez en presenza de familiares do matemático e colegas de Facultade. O fondo bibliográfico matemático de Enrique Vidal Abascal que permanecerá na biblioteca da facultade consta de 231 volumes, principalmente da área de xeometría e topoloxía. De entre todos eles destacan algunhas obras clásicas de matemáticos como Bianchi, Bieberbach, Blaschke, E. Borel ou E. Cartan dos anos 20 e 30 do pasado século. Á súa particular valía engádeselle o feito de que moitos volumes contan con anotacións caligráficas do propio profesor Vidal Abascal. Promotor da Real Academia das Ciencias de Galicia e director do Seminario de Estudos Matemáticos de Santiago de Compostela, Vidal Abascal destacou polos esforzos aperturistas da matemática española no eido internacional en tempos da posguerra. Numerosos docentes e persoal investigador se achegou á presentación (Foto: SERVIMAV)