As mellores ideas empresarias teñen premio na USC

En marcha o ‘XI Concurso de Ideas Empresariais Innovadoras da USC’ co que a Universidade de Santiago premia as mellores ideas, orixinais e innovadoras, susceptibles de converterse en proxectos empresariais a curto e medio prazo.
A iniciativa diríxese a todos os membros da comunidade universitaria e a todas as áreas de coñecemento. Outorgaranse cinco premios de seiscentos euros valorándose a viabilidade da idea, o carácter innovador, o grao de madurez e a posible aplicación das políticas de igualdade.
A inscrición no certame realizarase de forma telemática, cumprimentando o formulario que aparece na páxina web de Uniemprende. Así mesmo, poderase participar imprimindo o documento en liña e entregándoo nos rexistros dos Campus de Santiago e Lugo. O prazo de presentación rematará o 28 de novembro. Organizado pola USC, o concurso conta coa colaboración das Consellarías de Traballo e de Innovación e Industria.