Mercedes Novo achégase ás orixes do alzhéimer na casa do Saber na apertura do evento de divulgación científica DivulgaTerra
A Casa do Saber acolle este xoves 15 de novembro, a partir das 19.00 horas, a primeira das sesións de DivulgaTerra, o evento que quere difundir o traballo dos investigadores/as do Campus Terra da USC, así como promover o uso do galego como idioma de divulgación, e que chega á súa terceira edición.
O evento estrutúrase este ano en tres sesións temáticas (dedicadas ás Ciencias da Saúde; Ciencias e Tecnoloxía; así como ás Artes, Humanidades, Ciencias Sociais e Xurídicas) nas que ademais de intervencións breves nas que os investigadores darán a coñecer as súas respectivas liñas de traballo, haberá un relatorio amplo protagonizado por unha investigadora relevante do campus que exporá ante un público non especializado a súa actividade.
A vicerreitora de Coordinación do campus de Lugo, Montserrat Valcárcel Armesto, e a deputada provincial delegada da área de Promoción Económica e Social, Sonsoles López Izquierdo, inaugurarán este xoves a partir das 19.00 horas, a primeira sesión deste evento, no marco do que a profesora da USC Mercedes Novo falará do seu traballo de investigación arredor das causas do alzhéimer nunha sesión dedicada ás Ciencias da Saúde.
Ademais da exposición de Novo, a primeira entrega do DivulgaTerra contará coas intervencións de María Permuy Mendaña, quen explicará que é a microtomografía computerizada; Susana Remesar Alonso, quen falará da infección por Rickettsia spp. en carrachas recollidas en Galicia; as parasitacións en gando vacún nas comarcas de Ordes, Arzúa e Terra de Melide será obxecto de análise por parte de David García Dios; mentres que a interacción parasitaria entre o mexillón de río e o salmón será analizada por Pedro A. Castrillo Arias. A sesión tamén contará coas intervencións de Emanuel Felipe de Oliveira Filho, quen falará de metais pesados; e Pablo Sánchez Quinteiro quen afondará na anatomía do sexto sentido.
As mulleres científicas
Poñer o foco na relevancia das mulleres científicas do campus é outra das finalidades desta edición de DivulgaTerra xa que o xoves 22 de novembro, tamén a partir das 19.00 horas, Rosa Mosquera afondará no vínculo entre innovación, sistemas agroforestais e incendios, mentres que o 29 de novembro, Ana Goy aportará unha visión do Pórtico da Gloria despois da restauración. Xunto a elas, en quendas de 10 minutos, os e as investigadoras do campus presentarán as súas respectivas liñas de investigación ante un público non especializado.