Un milleiro de estudantes recibiu o recoñecemento da USC por obter os mellores expedientes nas ABAU
A USC celebrou este xoves 23 o acto de recoñecemento ao alumnado con mellores expedientes nas ABAU de entre todos os centros de ensino medio de Galicia, cifra que este ano ascendeu a 1.061 mozos e mozas. O acto desenvolveuse no Multiusos Fontes do Sar e estivo presidido polo reitor Antonio López. O conxunto do alumnado homenaxeado está conformado por un 70% de alumnas, fronte a un 30% de estudantes varóns. Ademais, na distribución por provincias, A Coruña concentra un maior número de mozas e mozos abranguendo preto da metade dos mellores expedientes, seguida de Pontevedra cun 30%. As porcentaxes de Lugo e Ourense sitúanse arredor do 11% e do 10%, respectivamente.
A sesión contou coa presenza de Judith Fernández Novoa, directora xeral de Ordenación e Innovación Educativa; do concelleiro de Xuventude e Deportes do Concello de Lugo, Mauricio Repetto Morbán; do segundo tenente de alcalde do Concello de Santiago de Compostela, Gumersindo Guinarte Cabada; e do delegado do reitor para Ensino Medio, Celso Rodríguez Fernández; así como unha representación do equipo de goberno e das direccións de diversos centros dos campus de Santiago e Lugo.
Julio Raposo Bouzas, estudante do CPR Manuel Peleteiro de Santiago, interviu en representación do alumnado de Bacharelato de Galicia; mentres que Francisco Javier Núñez Aguado, director do IES 'Nosa Señora dos Ollos Grandes' de Lugo, falou en representación dos centros de Ensino Medio de Galicia.
