O Miño á altura de Tui acolle en maio o I Trofeo de Remo Interuniversitario Interrexional
Equipos mixtos das universidades da Eurorrexión competirán a mediados de maio nas augas do río Miño, á altura de Tui, no ‘I Trofeo Interuniversitario de Remo. Barcos Dragón’. No evento participarán seis equipos mixtos correspondentes ás seis universidades da Eurorrexión - Santiago de Compostela, A Coruña, Vigo, Porto, Minho e Trás-os-Montes e Alto Douro- que disputarán unha carreira de 7 quilómetros.
Os detalles da competición explicáronos este martes en Tui o alcalde Antonio F. Fernández; o secretario xeral para o Deporte, José Ramón Lete; o reitor da Universidade do Minho e presidente da Fundación CEER, António M. Cunha; o director da Fundación CEER, Carlos Ferrás; e os deportistas David Cal e Enrique Míguez, campións olímpico e mundial de piragüismo, respectivamente.
Trátase dun evento deportivo único, promovido polo Centro de Estudos Eurorrexionais Galicia-Norte de Portugal (CEER) para promover a alianza estratéxica de cooperación transfronteiriza, que contará coa participación da comunidade académica da Eurorrexión e que pretende converterse nunha cita anual tendo como referencia a competición internacional Oxford Cambrige.
Co asesoramento dos departamentos de Deporte das universidades participantes na Fundación CEER, decidiuse escoller a modalidade de embarcacións tipo dragón, cunha arraigada tradición en Portugal, de fácil manexo e de gran visibilidade. Competirán os equipos das universidades conformados por cinco mulleres, cinco homes, un timonel (muller ou home) e un tamborileiro (muller ou home).
Este evento deportivo conta co apoio da Secretaría Xeral de Deporte, o Concello de Tui, Fundación Mondariz Balneario, Instituto do Desporto de Portugal, Federación Galega de Piragüismo, Federação Portuguesa de canoagem, Associação de Canoagem do Minho, Associação de Canoagem do Porto, as seis Universidades públicas da eurorrexión Galicia-Norte de Portugal, Caixa Galicia e deportistas de elite como David Cal e Enrique Míguez.