A mostra ‘Con nome de muller’ chega ao Edificio Emprendia

Logo dun periplo por distintos centros, a exposición ‘Con nome de muller’ está instalada ata finais de xaneiro no edificio Emprendia, en Campus Vida. Esta é unha iniciativa do Programa de Creación de Empresas da USC, Uniemprende, a través de Woman Emprende, que comezou en outubro de 2011 e que reivindica o protagonismo das mulleres emprendedoras ao longo da historia. ‘Con nome de muller’ fai visibles tanto a grandes emprendedoras como a pequenos proxectos liderados por mulleres que constrúen o día a día na vida, nos negocios, na investigación ou na universidade. A mostra, que xa se pode visitar no Edificio Emprendia, comezou a súa andaina no Claustro do Colexio de Fonseca, pasando despois polas facultades de Ciencias Económicas e Empresariais, Filoloxía, Filosofía, Xeografía e Historia, Dereito, Ciencias Políticas e Sociais e Matemáticas, ademais de polo Hospital Clínico Universitario. ‘Con nome de muller’ realiza un repaso polos inventos que contribuíron ao progreso e benestar da sociedade e que foron ideados por mulleres. Dende o lavavaixelas ata as axendas electrónicas, pasando polos pañais actuais, todos son inventos asociados a mulleres. Máis alá do seu propio valor histórico e referencial, a través destas experiencias o programa de emprendemento femenino Woman Emprende ofrece novos argumentos e fórmulas coas que animar ás universitarias a que dean o paso ao eido empresarial e ao emprendemento activo.