Obesidade e trastornos do comportamento alimentario, cuestións a debate no XV Curso sobre Progresos en Endocrinoloxía Pediátrica

A Aula Castelao da Facultade de Medicina abriu este venres 4 as súas portas aos máis de cen especialistas que participaron no XV Curso sobre Progresos en Endocrinoloxía Pediátrica. A inauguración oficial do encontro estivo presidida polo decano desta Facultade, José Mª Fraga Bermúdez, e contou coa participación do catedrático e director do encontro, Manuel Pombo, do xerente do Complexo Hospitalario Clínico Universitario de Santiago, Jesús Caramés, e do presidente da Sociedade de Pediatría de Galicia, Juan Sánchez Lastres.
A obesidade, os trastornos do comportamento alimentario e crecemento e desenvolvemento dos nenos foron as cuestións en torno ás que xiraron os debates do encontro que organiza a Unidade de Endocrinoloxía Pediátrica, Crecemento e Adolescencia que dirixe o profesor Manuel Pombo Arias, catedrático e director do Departamento de Pediatría da Universidade de Santiago.
O curso desenvolveuse arredor de tres mesas redondas nas que se trataron diferentes temas relacionados coas áreas máis actuais dentro da especialidade como son a obesidade e os trastornos do comportamento alimentario, situacións en relación coas que se debe implicar “de maneira moi especial” o pediatra, explican os organizadores. A este profesional –explican- incúmbelle desempeñar un “papel clave” na loita por combater a epidemia da obesidade, que comeza, “sen ningunha dúbida, nunha eficaz prevención”. Os expertos advirten de que se segue incrementándose a magnitude do problema, se continua aumentando a prevalencia da obesidade, “nuns poucos anos non existirá ningún país, por rico que sexa, que poida facer fronte economicamente a esta epidemia”.
Outra das cuestións a tratar é a do crecemento e desenvolvemento, campo no que progresivamente se producen novos avances tanto dende o punto de vista do enfoque diagnóstico como das novas posibilidades de tratamento. A este respecto, nestes últimos días aprobouse o tratamento con hormona de crecemento da talla baixa debida á alteración do xene SHOX e que se relaciona coa presentación, fundamentalmente, dun tipo de alteración relacionada co acurtamento da parte media das extremidades pero que tamén podería explicar algúns dos casos que ata agora os pediatras catalogaban como talla baixa de orixe descoñecida.
As mesas redondas complementáronse con outras conferencias que trataron materias de moi amplo interese. O doutor Fernández García, de Granada, falou do retraso constitucional do crecemento e do desenvolvemento, que ofrece as súas dificultades dende o punto de vista do diagnóstico e ao que actualmente hai que sumarlle recentes investigacións levadas a cabo con novos axentes terapéuticos que poderían mellorar a situación deses nenos. Pola súa banda, o doutor Labarta, de Zaragoza, comenta algunhas situacións de moi frecuente presentación como sería o da xinecomastia, o desenvolvemento de peitos nos varóns. A conferencia de clausura corre a cargo do catedrático emérito, profesor Peña Guitián, que disertará sobre o futuro da pediatría.