A Orquestra do Espazo de Cámara da USC ofrece este domingo o seu Concerto de Nadal

A Orquestra do Espazo de Cámara da USC ofrece este domingo 11 o seu tradicional Concerto de Nadal, que terá lugar a partir das 20.00 horas na Igrexa da Universidade con entrada libre ata completar aforo.

Baixo a dirección de Mario Diz, o programa do recital inclúe a Obertura Croesus (R. Keiser), A infancia de Xesús (H. Berlioz), O Voo sobre Exipto, Dream children (E. Elgar), Peer Gynt, suite nº 2, Op. 46 (E. Grieg), Danza Arábiga e Nun mercado persa (A. Ketelby).

CD conmemorativo
Esta iniciativa cultural universitaria cumpre este ano xa cinco anos de vida, un período no que participaron máis de 200 estudantes en 30 concertos públicos aos que asistiron máis de 3.200 espectadores. Conmemorando este primeiro lustro, o Espazo de Cámara acaba de publicar o dobre CD ‘ Un lustro de historia’ a modo de testemuña do traballo desenvolvido ata o momento.

‘Un lustro de historia’ recompila unha escolma das interpretacións da orquestra universitaria gravadas ao vivo en distintos concertos. O CD inclúe varias obras do patrimonio cultural galego como Camiño de Santiago de Henrique Saavedra, única gravación con orquestra sinfónica ata o momento desta obra; o Concerto de violín do pontevedrés Manuel Quiroga; e a Impresión noctura do coruñes Andrés Gaos. Tamén destaca outra obra infrecuente en traballos discográficos como o Trio Sonata para dous violonchelos de Haendel.

Entre os solistas convidados incluídos neste traballo figuran Roberto Santamarina, profesor do Conservatorio Profesional de Santiago; Gregory Nedobora, principal de segundos violíns da Real Filharmonía de Galicia; a arpista Reyes Gómez Benito, do conservatorio profesional de música de Badaxoz; Bárbara Switalska e Thomas Piel, principal e tutti; Enrique Roca, Ângela Neto e Guillermo Alzugaray, dous violíns e violonchelo respectamente; o acordeonista Javier Díaz e Carlos García Amigo, violonchelo tutti da Real Filharmonía de Galicia.