Outorgados os premios do certame de fotografía ‘A ciencia en imaxe’

As Facultades de Bioloxía, Ciencias, Física, Matemáticas e Química acaban de resolver xunto á Real Academia Galega de Ciencias (RAGC) a sexta edición do certame de fotografía ‘A ciencia en imaxe’, un concurso aberto a calquera persoa pertencente á comunidade universitaria da USC que participase con calquera tema relacionado coas ciencias, a investigación e a divulgación científica. Co gallo da celebración da festividade de San Alberte Magno 2020, o certame outorgou 300 euros para a fotografía gañadora e 100 euros, para as fotografías seleccionadas en segundo e terceiro lugar.

A fotografía ‘Atrapando un cometa’ de Alejandro Nieto Lareo, pertencente ao Centro de Tecnoloxías para a Aprendizaxe (CeTA), fíxose co primeiro premio. O segundo recaeu na profesora da Facultade de Ciencias M. Pilar Vázquez Tato e o terceiro, en Jesús Fernández Gutiérrez, alumno da Facultade de Bioloxía. As mencións de honra foron para María Jesús Varela Pulpeiro, persoal de administración e servizos na Facultade de Formación do Profesorado; Paula Rodríguez Villamayor da Facultade de Veterinaria; e Saúl de la Peña Lastra da Facultade de Bioloxía.