O Parlamento galego coloca en Fonseca unha placa conmemorativa do Colexio como a súa segunda sede

O reitor da Universidade de Santiago, Juan Casares Long, e a presidenta do Parlamento de Galicia, Pilar Rojo Noguera, descubrirán este venres 29 unha placa conmemorativa no Colexio de Fonseca para lembrar o 30 aniversario do traslado da Cámara galega a este lugar, onde o lexislativo autonómico tivo a súa segunda sede provisional. O acto comezará ás 11.00 horas co descubrimento da placa no vestíbulo para logo continuar no Salón Artesoado cunhas palabras do reitor e da presidenta da Cámara galega. Está prevista a asistencia de deputados que formaron parte da primeira e segunda lexislatura do Parlamento de Galicia; os ex presidentes da Xunta Fernández Albor e González Laxe; o ex presidente do Parlamento, Tomás Pérez Vidal; así como os actuais portavoces e membros da Mesa da Cámara.