As partidas decisivas do Campionato Galego universitario de Xadrez dispútanse este venres na USC

As partidas finais do Campionato Galego universitario de Xadrez dispútanse este venres, día 23, no Centro de Estudos Avanzados da Universidade de Santiago. Nestas competicións, organizadas pola Área de Deportes dependente da Vicerreitoría de Cultura da USC, participan membros das universidades de Santiago, Vigo e A Coruña, que poden non posuír experiencia en competicións deste tipo.
Realizado en colaboración coa Xunta de Galicia e as outras dúas universidades participantes, este campionato dividirase en dúas fases para diferenciar aos xadrecistas federados dos afeccionados. Deste xeito, na primeira das competicións medirase a calidade do xogo dos contrincantes segundo o sistema internacional de puntuación Elo.
O campionato, no que participarán estudantes, docentes e PAS das tres universidades galegas, seguirá o sistema suízo de xogo con ritmo para as partidas de 30 minutos máis 30 segundos por xogada. O comité de competición nomearase na xornada inaugural e estará formado por tres xogadores, un de cada universidade, e os árbitros.