O período lectivo na USC comeza o vindeiro día 13 coa inauguración do curso académico
O vindeiro 13 de setembro, coincidindo co acto de inauguración oficial do curso, iniciarase na USC o período lectivo. As clases dese primeiro período nos estudos oficiais de grao e máster comezarán o 14 de setembro e rematarán o 27 de xaneiro. O segundo período lectivo irá do 31 de xaneiro ata o 3 de xuño de 2011. As probas de avaliación que ata agora correspondían ao mes de setembro transcorrerán na primeira quincena de xullo. A Universidade de Santiago oferta este curso 2010-2011 un total de 49 graos, dos que 21 se imparten por vez primeira, completando así a adaptación da súa oferta de inicio de estudos ao Espazo Europeo de Educación Superior (EEES). Do total, 33 cursaranse no Campus de Compostela (24 con límite de prazas) e 16 no de Lugo. Este proceso de adaptación vense facendo dende hai anos na USC, de maneira que no curso que rematou agora hai xa graduados en Ciencia Política e da Administración, en Economía e en Enxeñaría Informática. No caso dos cursos aínda non adaptados ao EEES as clases do primeiro cuadrimestre comezarán o 1 de outubro e rematarán o 27 de xaneiro, mentres que o segundo cuadrimestre irá do 23 de febreiro ao 7 de xuño. Os exames serán na primeira quincena de setembro. Másters oficiais A Universidade de Santiago oferta un total de 76 másteres universitarios, dos que 62 teñen límite de prazas. A oferta total esténdese á totalidade de áreas de coñecemento con 16 títulos en Ciencias, 14 en Ciencias da Saúde, 19 do eido das Ciencias Xurídico-Sociais, 13 de Enxeñarías e Arquitectura e os 14 restantes da área de Artes e Humanidades. O período de matrícula para os alumnos procedentes de titulacións expedidas en España xa comezou e continúa ata o 10 de setembro nos posgraos sen límite de prazas, mentres que nos títulos con límite establécese un período de matrícula provisoria do 4 ao 10 de setembro. Igualmente, no caso da matrícula en títulos con criterios específicos de selección establécese o mesmo período, debendo formalizar a matrícula do 22 ao 24 de vindeiro mes de setembro.
O alumnado con estudos expedidos no estranxeiro deberán formalizar a súa admisión ata o 31 de agosto, mentres que a matrícula se formalizará do 4 ao 10 de setembro, sendo este mesmo o período no que deberá matricularse o estudantado que continúe estudos.