A Politécnica organiza o xoves 27 unha xornada de portas abertas dirixida a estudantes de ESO, BAC e Ciclos Superiores de FP

A Escola Politécnica Superior do campus de Lugo celebrará o vindeiro xoves, día 27 de febreiro, unha xornada de portas abertas dirixida a estudantes de 3º e 4º da ESO, Bacharelato e Ciclos Superiores de FP, que terán a oportunidade de participar nos distintos obradoiros prácticos programados e cuxa temática abrangue desde o guiado de tractor mediante GPS, agricultura ecolóxica, enxertado de árbores ou, entre outros, cata de queixos.

O obxectivo desta xornada, que se desenvolverá en horario de 10.00 a 20.00 horas, no pavillón III do centro universitario lugués, é o de dar a coñecer a oferta educativa d da EPS, ademais de informar a estudantes, pais e profesores sobre as saídas profesionais das titulacións impartidas, así como das posibilidades de completar estadías de prácticas en empresas, entidades ou institucións como primeiro paso para acceder ao mercado laboral. As persoas que participen nestas xornadas poderán completar visitas guiadas ás distintas dependencias (laboratorios, invernadoiros, aulas, fincas de prácticas...) da Escola Politécnica Superior, ademais de recoller diverso material informativo sobre os títulos en Enxeñaría Civil, Enxeñaría en Xeomática e Topografía, Enxeñaría Agrícola e Agroalimentaria e Enxeñaría Forestal e do Medio Natural, que conformarán a oferta de estudos de grao da EPS para o vindeiro curso 2013-2014. A inscrición nestas xornadas aínda está aberta e as persoas interesadas poden realizar as súas respectivas solicitudes a través do enderezo de correo electrónico epsubpra [at] usc.es (epsubpra[at]usc[dot]es) ou a través do número de teléfono 982 823 015.