Novo prazo de inscrición para o Verán CampUSC 2012

O programa Verán CampUSC 2012 dirixido a nenos e nenas de 3 a 13 anos de idade que organiza a Fundación USC Deportiva conta aínda con prazas libres nas quendas do 25 ao 29 de xuño, do 16 ao 20 de xullo, do 23 ao 31 de xullo e do 3 ao 7 de setembro. Todas as persoas interesadas, pertenzan ou non á comunidade universitaria, poden facer a inscrición a través da páxina web http://www.fundacionuscdeportiva.org ou de forma presencial na sede da Fundación. As prazas iranse cubrindo por rigorosa orde de inscrición. O programa, concibido para permitir conciliar a vida laboral e familiar neste período de vacacións escolares, inclúe numerosas actividades de ocio e tempo libre como obradoiros de pulseiras, máscaras, impresión á auga, cancións, excursións, e da práctica deportiva de esgrima, tenis, deportes de combate, psicomotricidade, atletismo, orientación, xogos predeportivos ou populares.