O prazo para a solicitude das bolsas Erasmus para o próximo curso remata o 29 de xaneiro

O próximo día 29 remata o prazo para a presentación de solicitudes á convocatoria de bolsas de mobilidade Erasmus para alumnado de grao no curso 2014-2015. Poderá participar o alumnado matriculado no presente curso na USC para realizar estudos oficiais de grao, licenciatura, enxeñaría, diplomatura ou enxeñaría técnica. O estudantado seleccionado para a mobilidade deberá formalizar matrícula na USC para o curso 2014-2015. As persoas interesadas deberán acreditar antes do remate o prazo de solicitude o coñecemento da lingua oficial do país de destino ou da lingua de uso da universidade de acollida. O nivel mínimo esixido a todas as persoas solicitantes será o B1 do Marco Europeo Común de Referencia para as Linguas (MECR). Certas universidades poden esixir un nivel de idioma superior. As solicitudes deberán realizarse en liña, a través da secretaría virtual do alumnado da USC. O prazo de presentación abrangue ata as 23.59 horas do 29 de xaneiro. Tanto a convocatoria, como os destinos ofertados, os documentos e formularios necesarios, están dispoñibles no portal internacional da USC.